Државниот завод за статистика на Северна Македонија како координативен орган на официјалниот статистички систем ја препознава потребата од родова статистика и ја изрази својата посветеност да прави и дисеминира родова статистика. И покрај вложените напори, вклучувањето на родовите аспекти во главните политики во целокупната национална статистика останува фрагментирана и сè уште не е целосно формализирана или призната како посебна одговорност од страна на сите официјални даватели на податоци во националниот статистички систем; сè уште недостасува централизиран координативен механизам за националната родова статистика.
Анализата, разгледува две клучни прашања и тоа: Како да се вклучи родовата перспектива во националниот статистички систем; и Кои се приоритетните области на кои им недостасува родова статистика. Документот се обидува да даде одговор на овие прашања преку анализа на правната и институционалната рамка на официјалниот статистички систем и националното законодавство, законодавството на ЕУ, стратешките и политичките документи поврзани со родовата статистика; анализа на постојните практики релевантни за производство и дисеминација на родова статистика; анализа на расположливите родови статистики и родови индикатори; анализа на достапни податоци поделени по пол од овластени тела за државна статистика; и анализа на можни административни извори за родово групирани податоци надвор од официјалниот статистички систем.